რამდენიმე დღის წინ რეპორტიორებმა პენელოპა კრუსი ფართო მაისურით დააფიქსირეს, რომელშიც მსახიობს მრგვალი მუცელი მოუჩანდა. ჰოლივუდში მაშინვე ახალგაზრდა დედიკოს მეორე ორსულობაზე დაიწყეს საუბარი. შეგახსენებთ, რომ ერთი წლის წინ ჰავიერ ბარდემსა და პენელოპას ვაჟი, ლეო, შეეძინათ. ამ ინფორმაციის გავრცელების შემდეგ ესპანელი ლამაზმანი ლოს-ანჟელესში გამართულ ფილმ „To Rome with Love"-ის პრემიერას დაესწრო, სადაც ჟურნალისტები კრუსის სხეულს დაჟინებით აკვირდებოდნენ, თუმცა პენელოპას კაბა არაფრის დანახვის საშუალებას არ იძლეოდა.

გრძელი ჩამოშლილი დრაპირება მის სხეულს იდეალურად ნიღბავდა. ამიტომ ამერიკული ტაბლოიდები მკითხაობას გაორმაგებული ძალით შეუდგნენ.იმავე ფილმის პრემიერა ნიუ იორკშიც გაიმართა, სადაც მსახიობმა ატეხილ ხმაურს საბოლოოდ დაუსვა წერტილი. წითელ ხალიჩაზე პენელოპას ტანზე მჭიდროდ მომდგარი კაბა ეცვა, რომელშიც ესპანელი ლამაზმანი არაჩვეულებრივად გამოიყურებოდა. ამ სამოსში პენელოპას ბრტყელი მუცელი ადვილი შესამჩნევი იყო. ფილმის ჩვენების შემდეგ კრუსმა გადაწყვიტა, ოჯახთან ერთად დაესვენა. ვარსკვლავი მეუღლესთან, ჰავიერთან და ვაჟთან, ლეოსთან ერთად ძიძისა და პირადი მცველის გარეშე ნიუ იორკის ქუჩებში სასეირნოდ გამოვიდა. იმისათვის, რომ ჭორების მორიგი სერია თავიდან აეცილებინა, ამჯერად მსახიობმა მჭიდროდ მომდგარი შავი მაისური ჩაიცვა.