მელბურნში კონცერტზე ლედი გაგამ მსმენელს სიმღერა სახელწოდებით „Princess
Die" პირველად წარუდგინა. მომღერალმა საზოგადოება თავიდანვე გააფრთხილა,
რომ კომპოზიციას არავითარი საერთო არ აქვს პრინცესა დიანასთან, თუმცა
სიმღერაში გარდაცვლილი ლედი დის ცხოვრებაზე მინიშნებები მაინც იყო. ტექსტში
ნახსენებია მილიონერი შეყვარებული, რომელმაც ქალს ძვირფასი ბრილიანტის
ბეჭდით ცოლობა სთხოვა. სიმღერა ასევე პაპარაცების მოულოდნელ თავდასხმასაც
ეხება. „შეიბრალეთ კიდევ ერთი გარდაცვლილი ქერა ქალი, რომლის ნამდვილი
პრინციც უკვე ზეცაშია!" - მღერის გაგა. ვარსკვლავმა თავისი უმცროსი ასაკის
თაყვანისმცემელთა მშობლების უკმაყოფილება გამოიწვია, რადგანაც ახალ
სიმღერაში სუიციდზეა საუბარი. „მე მინდოდა, გავმკლავებოდი ყველაფერს,
მაგრამ აბები დავლიე და წერილი დავტოვე", - ნათქვამია სიმღერაში „Princess
Die". საავტორო ორგანიზაცია „Lifeline"-ის წარმომადგენელმა, რომელიც
ახალგაზრდებს ფსიქოლოგიურ დახმარებას უწევს, აცხადებს, რომ ლედი გაგას
სიმღერის ტექსტმა შეაშფოთა. „ის დეტალურად აღწერს ცხოვრებიდან წასვლის
მეთოდს. იქ არ არის რაიმენაირი იმედი ან პოზიტივი. ჩვენ გვესმის, რომ ეს
ხელოვნებაა, მაგრამ ცნობილმა ადამიანებმა უნდა გაიაზრონ, რა არის
ახალგაზრდებისთვის მისაბაძი", - აცხადებს კრის ვაგნერი.
